Dis d'aventuras

 

Ils Dis d'aventuras 2025

Quest onn han ils Dis d’avenutras gì lieu dals 11 fin ils 13 d’avust a Turitg, a Winterthur ed a Cuira. Per il program e la realisaziun èn stadas responsablas da nov Ursina Giger e Niculina Plebani.

Entschet han ils Dis d’aventuras en il zoo da Turitg. Là han ils uffants survegnì ina visita guidada exclusiva per rumantsch da la tgiradra d’animals Kim Manetsch, oriunda da Mustér. Il mardi è la gruppa s’inscuntrada a Winterthur. En il center da temp liber Holzlegi ha Mirco Seeli da la Scola auta spezialisada dal Grischun zambregià cun ils uffants in avieul roboter. Per ils uffants è quai stà in’introducziun ludica en il mund da la robotica.

Per finir han ils uffants fatg la mesemna in'excursiun en la chapitala grischuna. A Cuira han els visità RTR e survegnì in'invista en il mintgadi d’ina chasa da medias rumantscha. Il suentermezdi èn els stads en il Museum da la natira dal Grischun ed han perscrutà cun grond interess la vulp, a la quala è deditgada in'exposiziun speziala.

 

Ils Dis d'aventuras 2024

Quest onn han ils Dis d’aventuras gì lieu dals 12 als 14 d'avust. Las manadras Ursina Giger, Pia Plaz, Madleina Candrian, Niculina Plebani ed assistents han realisà - en collavuraziun cun la Lia Rumantscha - danovamain interessants Dis d’aventuras da stad.

Ils uffants han fatg in lavuratori da versets, chant e musica cumbinà cun gieus, moviment e ritmica,  cuschinà spezialitads grischunas ed experimentà cun tinta magica, laschà explodir vulcans e zambregià sfunsaders en las localitads da la Scola politecnica da Turitg/ETH.

Ils Dis d'aventuras 2023

Quest onn han ils Dis d’aventuras gì lieu dals 14 als 16 d'avust. Las manadras Olivia Spinatsch, Manuela Bühler, Livia Degonda e Niculina Plebani han en collavuraziun cun la Lia Rumantscha danovamain realisà interessants Dis d’aventuras da stad.

Ils uffants han fatg in lavuratori cun la famiglia Babulin a Turitg, ina visita a RTR a Cuira cun il tema «mia professiun da siemi» ed han construì danovamain rachetas sut l’egida da la Scola auta spezialisada dal Grischun.

Impressiuns dals Dis d'aventuras 2022